Dette er signaturen til Torger Iverstugun. Han var ein av dei mest særmerkte personane Skåbu-bygda har fostra. Derfor har han fått si eiga side her hos Mukampen spel- og dansarlag.

Her er noko av det som står om han i boka som er nemnt nedanfor: «Ekko frå fjellet»
Torger Iverstugun var ein skapande og allsidig kunstnar som voks ut frå små kår i Skåbubaklia. Han arbeidde seg fram til å bli ein original tonekunstnar og innsamlar av folketonar, og ga også ut eit hefte med eigne dikt og tekster, «Ekko frå fjellet». I tillegg var han eit aktivt og engasjert samfunnsmenneske. Torger var i det heile ein intelligent og slagferdig kar.

Torger Iverstugun hadde eit innhaldsrikt liv – eit liv som han fylte med mange oppgåver. Han fekk med åra eit vidt kontaktnett både lokalt og vidare utover. Han var tiltaksrik og brydde seg mindre om kva andre måtte meine om han, og korleis han levde og bar seg åt i ulike samanhengar. I samtid og i ettertid synes det klart at kjerringa hans, Marit, var ein krumtapp i familien, men ho gjekk bort så altfor tidleg i 1947.

Det seier seg sjølv at det er bortimot uråd å setja opp eit detaljert oversyn over livsgjerninga hans. Dette oversynet syner likevel sentrale sider ved det breie engasjementet han hadde på ulike område, ikkje minst i arbeidet for å betre livskåra for folket i Skåbubaklia. Vel 50 år etter at han gjekk bort forstår vi at han har vore underkommunisert i stor grad. Og vi gløymer fort ……